عن الشّعر قال:
طرح السّواقى أحاسيس
وشعوره ناعمه ورقيقه
يكفينا شر المداسيس
بيزوّدا نار الحريقه.
ــــــــــــــــــــــــــ
الطّرح لوجه لموجوع
يمكن يخفف من آلامه
واللى بيسرق من الجّوع
ع السّرقه ما حد لامعه.
ــــــــــــــــــــــــ
الشّعر مش شى ترفيه
لكل حابل ونابل
ولا توب طويل حترفيه
الشّعر زى القنابل.
ــــــــــــــــــــــــ
يااللى إنت شاعر و دكتور
تدرى الأدب والرجوله
فارس بقلمك وداك تور
ينطح وترفس رجوله.
ـــــــــــــــــــــــ
وعن المقاومه قال :
القدس أرض النّبوّات
مهد المسيح ف الطّفوله
ياما فيها بيّن نبوات
ياعربنا فين الرّجوله.
ـــــــــــــــــــــــ
الدّم سايل فى غزّه
فيضانه غطّى الأراضى
وعربنا قاعدين ف غرزه
والكل شايف وراضى.
ـــــــــــــــــــــــ
جيش العرب فى السّلاحليك
قاعد يستّف مدافع
لاعايز يمد السّلاح ليك
ولا حتّى سايبك تدافع.
ــــــــــــــــــــــــــــ
يا وطنّاميتى راح تفوق
قطّعت توب العروبه
خليت جمالك بقت نوق
وسباعنا صبحت ركوبهّ
ـــــــــــــــــــــــــــ
يا مصر شدّى العزايم
لمّى الصّفوف وحّديها
كفيانا فرقه وهزايم
ما فى حد غيرك حديها.
ــــــــــــــــــــــــــ
أنا عندى عِمّه وطربوش
من عصر جدّى ف زمانه
من جزمه واحده طار بوش
وجه أوباما مكانه.
ـــــــــــــــــــــــ
وفى الحديث عن مصرقال:
ما طلبش منّك ألوفات
ولا ورث طالب ف نيلك
لمّى العقارب والأفات
دا بعوكى ومبّهدلينك.
ـــــــــــــــــــــــ
وفى قناية الحكمه يقول:
النّدل إوعاك تماشيه
لو حتّى وقتك خِليلك
واجب عليك ان تحاشيه
ولا تاخدُه مرّه خَليلك.
ـــــــــــــــــــــــــ
النّدل واطى ما يعلاش
لو يملك الدنيا بإيده
يلوّش وكَنه ما لاش
ويجيك وعايزك تزيده.
ــــــــــــــــــــــــ
يا بنّا عندى تع ابنى
أنا طوبى وسْمَنتى حاضر
لُوم القرابه تعبنى
م ف مرّه بيقولوا حاضر.
ــــــــــــــــــــــ
الحجل يابت شخلن
صحّى شعورى الدّفينه
خليتى قلبى اللى شاخ لان
وبطوبه حتّى إحدفينا.
ــــــــــــــــــــــــ
أنا شُفت قُلّه مع زير
والزّير م سادد مكانه
تيجى تقولّه معازير
وفيه زير سادد مكانه.
ـــــــــــــــــــــ
وحينما تكلّم عن الدنيا قال:
والله ظُلمك دبحنى
صابر يا دنيا وعايش
من غُلبى ماشى وباحنّى
لجلٍ تُهون المعايش.
ــــــــــــــــــــ
وعن المرأة قال:
تاخد الأصيله تعلّيك
والعرض منها تصونه
أمّا الخسيسه تِعلْ..ليك
لو قصر هدّت حُصونه.
ــــــــــــــــــــ
أصل الأصيله ليها ناس
وكبير له رأى صايب
الغلطه بيطيّر فيها راس
يكفينا شر المصايب.
ــــــــــــــــــ
مربعات الشاعر المصرى/
حسين السّوهاجى
